РУДАРСКИ СИМПОЗИУМ “ПОДЕКС-ПОВЕКС” – РАДОВИШ ‘14

Денес во хотелот Бел Камен во Радовиш се одржа Седмото стручно советување на тема: Технологија на подземна и површинска експлоатација на минералните суровини “Подекс-Повекс“ ’14, кој е во организација на Здружението на рударско и геолошки инженери на Македонија.

Со преку 100 учесници од Македонија, Србија, Бугарија, Босна и Херцеговина и други земји беа претставени 23 научни труда од вкупно 41 пристигнати за овој симпозиум.

На почетокот беше избрано работно претседателство на чело со Проф. Д-р. Ристо Дамбов, а симпозиумот го отвори Заменик генералниот директор на рудникот Бучим Николајчо Николов.

Во текот на целиот работен ден свое излагање имаа и голем број на учесници и претставници: Деканот на факултетот за природни и технички науки при УГД Проф. Д-р Зоран Панов, Деканот на технoлошко металуршкиот факултет Проф. Д-р Александар Димитров, Претставници од Mинистерството за економија, претставници на сојузот на рударски инженери на Србија и професори од рударско геолошкиот факултет од Белград, претставници на научно техничкиот сојуз на Бугарија, претставници на рударскиот сојуз на Босна и Херцеговина, како и претставници на компании за рударска опрема и машини.

Во целодневната програмска содржина преку презентациите беа објаснети состојбите во рударството во Република Македонија и перспективите за наредниот период, беше направен осврт кон престојните истражувања на јаглен низ Македонија, беше претставена Минерално-суровинската политика на Бугарија на почетокот на 19 век, беа објаснети основните принципи на заштита на животната средина при изградба на рудник за јаглен и термоцентрала, и многу други геолошки истражувања и примени на софтверски програми за проектирање и моделирање на рударството.

Рударскиот симпозиум завршува утре со посета на рудникот Бучим во Радовиш од страна на гостите.